متن نوحه ترکی مرحوم منصور تبریزی
مجموعه اشعار آیینی و مذهبی مرحوم منصور تبریزی در مدح و رثای اهلبیت علیهم السلام ، متن نوحه ترکی از مرحوم منصور تبریزی
---
احوالات حضرت قاسم (علیه السلام)
وداع ایدوب آناسین عم مهربانیندن
جهاده عازم اولوب گیچدی خانمانیندن
اوجالسین ,الم آرا چتربیدق اسلام
تمام شوقیله ال چکدی باش و جانیندن
او آهوی حرمی کینه ایله مین صیاد
کنار ایتدیله ظلمیله آشیانینده
آلوب آرایه زبس یاره ووردولار گل تک
بویاندی قانه آخان لخته لخته قانیندن
او شاهزاده نی ظلمیله بیر لعین دنی
آیردی جوریله امام زمانیندن
قلجلادی باشینی قان آپاردی بی طاقت
یوزی استه یخدی اونی حیف گلعذارینده
باخاردی خیملره حسرتیله چوخ نگران
ایدردی رمزیله آگه غم نهانیندن
بلا و مخنت هجریله قان اولان جگری
دوباره قانه دونوب ناله و فغانیندن
هنوز قبریده حزن و شوریله آغلار
آناسی یاندوری ارواحی الامانیندن
مگرتصوری آساندی فکر قیل (منصور)
آنا ننوعیله گیچدی ایله جوانیندن
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
احوالات ورود به مدینه
مسافران دیار بلا و محنت و غم
مجاوران مقام جفا و درد و الم
اولوبلا وارد شهرمدینه دلده فغان
گیدوبله قبررسول خدایه ناله کنان
زبسکه چکمیشیدی غصه زینب نالان
دوشندی قبررسول خدایه اورک دولی قان
ادبله عرض ایلدی باخ بوزاره یاجدا
گلوب ننوعیله گور آه و زاره یاجدا
گتورموشم سنه قارداشیمین الوم خبرین
کفایت ایلر ایدم بیراشاره یاجدا
نه حاله گورسالوب آخرحسینیوی امت
بو قانلی کوینگه ایله نظاره یاجدا
سنون گوزیندن ایراق تشنه لب قوری یرده
وجودین ایلدیلر پاره پاره یاجدا
اون ایکی ضربتیله کسدیله باشین دالیدان
آپاردیلارباشینی هردیاره یاجدا
ووروبلا باشیمیزه تازیانه لرسانسیز
چکنده مجلس شرب و قماره یاجدا
گوزوم باخا باخا آلدی الینه چوب یزید
دوباره ووردی دل زاره یاره یا جدا
او قدری ووردی حسینین سوسوزدوداقلارینا
که آخدی قرمزی قان گل عذاره یا جدا
بو سهلیدورکه اسیراولموشام قولی باغلی
چکوبله شامیده هر رهگذاره یاجدا
آلشدیران جگرزینبی شماتتدور
نقدری صبر ایده بو گونی قاره یاجدا
گورن دیردی بیزه خارجی اسیری گلور
هزارلعن اولا بو روزگاره یاجدا
چوخ آرزو ایدرم محضرین اولا خلوت
ایدم لباسیمی آخر کناره یا جدا
ویرم نشان بابا من تازیانه یرلرینی
نیدوبله تا گوره سن بیربو زاره یاجدا
بو قدربل داخی بوندانصورا یوزوم گلمز
تاپانمارام بو غم و درده چاره یاجدا
کنار قبررسول خداده آل الله
ایدوبله غصه لریندن او حضرتی آگاه
دوروب ایاقه هامی ناله و فغانیله
بتول قبرینه گلدیله مین نوائیله
یتوشدی زینب کبرا انا مزارینه
دوشندی سایه کیمی قبرمشکبارینه
آلوب الینه حسینین او قانلی کوینگینی
آنایه اوغلونون ایتدی اشاره المگینی
همین بوغملره (منصور) اولدی چون آگاه
اودور که ختم کلام غم ایلدی ناگاه
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
زبانحال حضرت فاطمه زهرا (سلام الله)
ای بو جسم و جان ایچنده جان اولان جانان عم اوغلی
آز قالورچیخسون کناره جسم و جاندان جان عم اوغلی
محرم اسرار سنسن بلوسن سرنهانی
چکمیشم من آززماندا چوخ غم و درد و بلانی
کاش اولا چون خانه دل خانه ویران بو جهانی
ایلدی ویرانه قلبی چون دل ویران عم اوغلی
گردشیم چرخ جفاده حدی اتمامه یتوشدی
گوندوزوم محنت الینده ظلمت شامه یتوشدی
جام پرزهرمصیبت تلخ اولان کامه یتوشدی
مونسیم اولدی همیشه ناله و افغان عم اوغلی
گورمدیم خوش گون جهاندا دایم اولدوم مونس غمبار
غمدن سرو قدیم اولدی چون زلف سیه خم
چاره سی یوخدور بو دردین عاقبت حسرتله الم
آتش آهیله یاندی سینه سوزان عم اوغلی
دوندروب خوش نوبهاری صرصرمحنت خزانه
گلشن عمریم سارالدی یتدی غم سرو روانه
لاله تک قان اولدی باغریم نارغمله یانه یانه
دوشدی جسم و جان پاکه آتش هجران عم اوغلی
جانه گتدی من ضعیفی کینه اهل عداوت
ایریلوق وقتی یتوشدی قالمادی تابیله طاقت
گل حضور پاکه ایلوم عرض حال و کشف حالت
قان اولان گوگلیمده واردور چوخ غم پنهان عم اوغلی
اودووروب یاندوردی ثانی درگه والایه گوردون
هرنه وار جورو جفالر ایلدی زهرایه گوردون
سیندوروب پهلومی دوشدوم تپراقا چون سایه گوردون
محسنیم سقط اولدی باغریم لخته لخته قان عم اوغلی
یتمدیم کامه جهاندا حسرتیله چیخدی جانیم
تیز یتیم اولدی حسین و هم حسن ای مهربانیم
زینب و کلثوم قالدی غم الینده همزبانیم
قبرایوینده اولدی درد بیحد و پایان عم اوغلی
آگهم بو روزگارین هربلا و محنتیندن
وار باشیندا چوخ جفالر زینبین اندوه و غمدن
تاراولارزلف سیه تک گوزلرینده روز روشن
باغرین ایلرقان سراسر کینه عدوان عم اوغلی
روزعاشورا دیارکربلاده آشکارا
یدی قارداشین ستمله تشنه لب دوغرالا اعدا
سینه سی استه قویالار بو حسینین چکمه لی پا
اون ایکی ضربتله باشی ذبح اولار عطشان عم اوغلی
بیله ظلم اولماز جهاندا هیچ غریب و بی پناهه
حکم ایدرسعد اوغلی لشکراودوورالار خیمگاهه
یوزقویارآل پیمبر باش آچوق هرسمت و راهه
قولارین باغلارطنابه شمربی ایمان عم اوغلی
وارنقدری جسم و جاندا رشته جاندان علاقه
دایما سال شور(منصور) شوریله دشت عراقه
بیله عرض حال اولوندی جان یتن وقته تمامه
ای بو جسم و جان ایچنده جان اولان جانان عم اوغلی
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
احوالات مجلس ولید
اولوبدی فرض خداونده امتحان جهان
سبب اودور که اولور امتحان نهان و عیان
گهی وجودعلی امتحان عالم اولور
گهی امام حسن گه امام تشنه لبان
سین ننوعیله اسباب امتحان اولدی
بو طرزیله ایلیوبلر او امتحانی بیان
اولوب معاویه چون جانب جهیمه روان
یزید کافراولوب خلقه صاحب فرمان
اوتوردی تخت ولایتده چون او غاصب حق
تمام شهرلره حکم بیعت ایتدی روان
یازوب مدینه پیغمبره خلافتینی
ولید ایلدی خلقه بو مطلبی اعلان
خیال خامیله یازموشدی نامه سینده ولید
آلا حسینیده عهد خلافته پیمان
ایدوبدی دعوت امام حسینی مجلسینه
ویروب او نامه نی سلطان مشرقینه نشان
بویوردی شاه شهیدان بو امراعظمدور
گرک بو صحبت اولونسون عموم ایچره بیان
ولید راضی اولوب لیک بیحیا مروان
ولیده سویلدی مشکلدی بیرده بیله مکان
گرک بو ساعت آلونسون حسینیدن بیعت
قبول ایلمسه ایله قانینه غلطان
ایشتدی بو سوزی اول وقته تا امام همام
اوجا سسیله دیوب ای لعین بی ایمان
کیمین نه جرئتی واردور منه جسارت ایده
هنوز واردی جوانان هاشمی یاران
سسین ایشتدی امامین او دمده یارانی
توکولدولرهاموسی الده خنجربران
آلوب آرایه امام حسینی مجلسدن
کناره چکدیله گیزلندی بیحیا مروان
بو سوز الیمدن عجب اختیاریمی آلدی
گتوردی خاطریمه بیر مصیبت پنهان
هایاندا قالموشیدی شیعه یوم عاشورا
او با وفالر او ساعتده یا امام زمان
باخوب صاقا صولا حسرتله آختاروردی کمک
تاپولمادی سسینه سس ویرن قالوب حیران
نگوردی اهل حرم خیملرده آغلاشوری
قیتدی خیمیه اول پادشاه مظلومان
بویوردی زینبه باجی مگر نولوبدی سبب
بو نوع اهلحرم آغلاشورباه و فغان
دیدی باجون سنه قربان سن آختاراندا کمک
اوزینی سالدی علی گاهواردن اوزما
بقیه این احوالات در
جلد 59 گنجینه گذشتگان (دیوان منصور) ثبت شده است
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
خطبه حضرت امام حسین (علیه السلام)
به اصحاب درشب عاشورا
ای جماعت کعبه مقصود یاره گلمیشم
بیر مقدس فکریله من بو دیاره گلمیشم
گلمیشم من بو مقام حقده جانیمدن گیچم
جان و مال و اهل بیت و خانمانیدن گیچم
اکبرمهپاره تک نازلی جوانیمدن گیچم
بلموشم لایق اونی بو افتخاره گلمیشم
بلموشم چون باتماسام آلقانیمه بو چولده من
آشکاراولمازحقیقی معنی حب الوطن
زینب و عباسیله قورام بو چولده انجمن
زنده دل بیر جمعیله کوی نگاره گلمیشم
هرکسین واراوزگه بیرفکری خیال خام ایدوب
دلده کی تصمیم و عزمیم ضدینه اقدام ایدوب
حق یولوندا الماقی جدیم منه اعلان ایدوب
آخماقا قانیم سو تک بو کوهساره گلمیشم
بلسون هرکیک که منیله بو یولا همراهیدور
منله هم مسلک اولان هرخاطرآگاهیدور
بو بلالی چول منه بیرقانلی قتلگاهیدور
بو یره اولماقه نعشیم پاره پاره گلمیشم
حفظ استقلال اسلامه فداکارم اوزوم
دینه قربان اولماقا تشنه سزاوارم اوزوم
من بو گون اسلامیانه میر و سردارم اوزوم
یتماقا خونین تنیله وصل یاره گلمیشم
اولماقا عالمده دایم خانه کفری خراب
ایلرم بو وادب محنتده عالی انقلاب
ایلینلر بو مرام پاکی مسلک انتخاب
ظلمیدن آزاد اولانلار آشکاره گلمیشم
تشنه لب یتمیش ایکی جان شوقیله قربان اولار
اوآخان سو تک قزل قان زینت قران اولار
چکماقا اسلامی ذلتدن کناره گلمیشم
تا نقدری جاندا جان وار دشمنی خوارایلرم
دشمن اسلام و دینین کفرین اظهارایلرم
بیعت نحس یزید کافره عارایلرم
ذاتی پاکی عزتیله روزگاره گلمیشم
وارنچه تازه جوان منله بوگون همراز اولوب
کلمه دینی اوحاتماقلقدا هم آواز اولوب
جمله سی اخلاصیله آماده اعزاز اولوب
بو مکاندا یتماقا خوش اعتباره گلمیشم
قارداشیم عباس تک واردورعلمداریم منیم
دینی استه جان ویرن لب تشنه سرداریم منیم
قارداشیم پشت و پناهیم یارو غمخواریم منیم
بو سپه سالاریله بو کارزاره گلمیشم
اکبر و قاسم جوانان بنی هاشم تمام
صدقیله ایلله بو صحراده تعقیب مرام
دین اسلامی دیریلدر آشکارا بو مرام
پایدار اولماقلیقا دین پای داره گلمیشم
طفل شش ماهه علی اصغر لب عطشان اوخلانار
سو یرینه لخته لخته نوش ایدرقان اوخلانار
اللریم استنده ظلمیله او نالان اوخلانار
خوش نشاندور حلقی تیر زهرداره گلمیشم
چون بلور دشمنلریم باشیمده واردور نه خیال
من پیمبراوغلیام اما بو قوم بدخصال
جهلیله بو گون بلولرقانیمی یکسرحلال
حقی اثبات ایتماقا بو اهل ناره گلمیشم
منده ال چکمز بو اهل کینه چوخ بیداد ایدر
خاندان مصطفانی کوفیان بر باد ایدر
خیملرغارت اولاراهل حرم فریاد ایدر
گورماقا آللهی ناقه سواره گلمیشم
مسلک پاک حسینی بن علی(منصور)عیان
مسلک پاک سیاستدور حقیقت هرزمان
کاشف اسرار حقدوربرملا بو خوش بیان
ای جماعت کعبی مقصود یاره گلمیشم
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
احوالات دفن شهدای کربلا
یتوشدی امرالهی امام سجاده
اولوب اطاعت ام خدایه آماده
قویوب اسیرلری کوفه ایچره زنداندا
یتوشدی قتلگهه گوردی چون او صحراده
مجاهدان حقیقی فی سبیل الله
چهاد اصغر و اکبر ایدوبله معناده
اولوبلا جمله شریعت یولوندا تشنه فدا
یتوب سعادته عزت تاپوبلا عقباده
گراولماسیدیله بو قدر باوفا هرگز
امام اولمازیدی حاضراول مصلاده
ازل حسینین او صد پاره پاره پیکرینی
چکوب کنارینه گلدی فغان و فریاده
کسلموش اللرینی قویدی سینه سی استه
ایدوب سرشک روان گلدی ناله و داده
علی اصغری آغوشینه ویروب جان تک
اولا شفاعته سرمایه حشرکبراده
علی اکبری دفن ایتدی زیر پاینده
آتا ایاقینه قویدی یوزین او شهزاده
حبیبی ایلدی دربان بارگاه امام
همیشه لیق شرفین تاپدی باب والاده
قالان شهید لری خاک و خونه آلوده
قویوب محافظت روضه مطلاده
باخوب صاقا صولا حسرتله چکدی دلدن آه
تاپوب عمو بدنین آغلادی او ناشاده
گوروب نه باشی بدنده نه قولاری تنده
دگوبدی بیربیرینه یاره قانلی اعضاده
اورکلنوب اوجادوب ناله سین فغانیله
آلیشدی سینه سی چون دوشدی غملری یاده
عمو گوریندن ایراق دشمنه اسیر اولدوق
پیمبرین حرمی قالدی ظلم اعداده
همان مکانیده دفن ایتدی تشنه سقانی
مقام غم درست ایلدی او ماواده
علم الینده دوروب منتظر یول استنده
که تز یتورسون اوزین سسلینده امداده
الهی قسمت اولیدی بو جمعیله (منصور)
قویردیلر یوزاو عالی مقام آباده
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
احوالات خرابه شام
چون منزل ایتدی آل پیمبرخرابه ده
عرشه اوجالدی ناله سراسرخرابه ده
عرش خدایه فخرایلیوب سرفرازاولوب
خاک سیاه اولدی معطرخرابه ده
ناموس پرده سینده اولان بیر خانملارا
یرویردیلر او قوم ستمگر خرابه ده
بی فرش و بی چراغ قوری یرده آج سوسوز
جانه یتوشدی عترت حیدر خرابه ده
مرغ شکسته بال کیمی سربزیر پر
آغلاردی صبح و شام حرملرخرابه ده
یاده دوشنده عزتیله اوز وطن لری
غربت ایدردی جوخلی اثرلر خرابده
بی اختیار سس چکوب آغلاردیلار تمام
ظاهر اولوردی شورش محشر خرابه ده
اکبردیوب رقیه سیزیلداردی نی کیمی
دائم ایدردی ناله مکرر خرابه ده
حسرتله سویلویردی علی قارداش هارداسان
گل بینوا باجین سنی گوزلرخرابه ده
الحق یقینیدور بو که نازلی رقیه نی
ایتدی هلاک فرقت اکبرخرابه ده
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
آمدن ذوالجناح به خیمه ها
چون دوشدی شاه تشنه لبان ذوالجناحیدن
گودال قتلگاهه جفای سپاهیدن
آغلارگوزیله ایتدی او حالتده ذوالجناح
آلده بال و کاکلینی خون شاهیدن
ناله کنان شیهه زنان اشک غم فشان
یوزقویدی خیمگاهه او دم قتلگاهیدن
ناگه ایشتدی شیهه سسین اضطرابیله
بی اختیارچیخدی هامی خیمگاهیدن
نه گوردولرایردولانوب بال و کاکلین
قانه باتوب یوزی دوتولوب گرد راهیدن
آلدی آرایه یکسر او حیوانی اهلبیت
روی سپهرتیره اولوب دود آهیدن
ایتدی سکینه بسکه فغان یاندی ذوالجناح
آه و فغان و ناله اول بی پناهیدن
ازبس بابا بابا دیدی فریاد ایلدی
ایتدی روانه گوزیاشی ظلم سپاهیدن
سالموشدی تشنه لب یولا چونکه باباسینی
ایتدی سئوال حال شهید الاهیدن
گویا زبانحالیله سویلردی ذوالجناح
ای گونی قاره یانما بو حسرت نگاهیدن
ظلمیله تشنه لب باباوی الدوروبدوله
بو خیمگاهی دولدوروبدولا چون اشک آهیدن
اول پاره پاره نعشینی عریان سالوبدولار
ایسی قوم استه یاندیم او حال تباهیدن
واردوراورکده حاجتی ایت چاره یاحسین
(منصوره) لطف و مرحمت گاه گاهیدن
مرحوم منصورتبریزی
دیوان مرحوم (منصور تبریزی) تحت عنوان
جلد 59 گنجینه گذشتگان انتشار یافت
منبع کانال گنجینه گذشتگان
----------- متن اشعار منصور تبریزی ---------
احوالات حضرت امام جعفر صادق (ع)
منصور ایدوب آزارلر از بس امام جعفره
جور و جفا و کینه سی ایتدی اثر پیغمبره
حکم ایلدی حاضر اولوب بزم سیاستده امام
قالدی ایاق استنده اول عرش خداونده قوام
ویردی فسرده حالیله منصور بیرحمه سلام
واللهی چوخ مشکلدی بو توهین آتاسی حیدره
زهرا بهشتی ایلسه بیت الحزن ذی حقدور
گورسون ننوعی عترتی دریای غمده غرق دور
در حالتیکه فاطمه ملکی بو غرب و شرق دور
خصم جفا پیشه سالوب اولاد پاکین چوللره
بیر نوعی مظلوم عالم آل محمد اولدی آه
آتلار دوشینده چکدیلر مین زحمتیله گاه گاه
تائیر ایتدی دشمنه حال امام بیگناه
اما اثر ایتموب دل منصور او نسل ابتره
بیر نامناسب حالت تحقیریله اول بیحیا
ایتدی دوباره حاضر بزم سیاست بر ملا
بیدین و لامذهب دیوب بر حق امامه ناسزا
طغیان کفریله آچوب دل نامناسب سوزلره
بهتان دیوب هم سویلدی ظلمیله نا حق افترا
صادق امامه نسبت کذبیله اول نسل زنا
شمشیر الینده دمبدم قصد هلاک ایلردی تا
ظلم ایلسون جدی اولوب ناصر او بیکس سروره
علت ندور بلمم نچون بو رحمه للعالمین
چوخ صبر ایتدی ایتمدی ویران یزیدین مجلسین
گوردی الینده خیزران گتدی بروزه کینه سین
پی هم ووروب چوب جفا تشنه یارالی لبلره
هر چند فوق العاده بیر غمدور امام جعفره
اما امام سید سجادیده باخ غملره
بزم شراب ایچره دوروب حیران باخوب دشمنلره
طعن و شماتت آتشی اود ووردی خونین دللره
چکدی امام جعفر صادق نلر منصوریدن
بیر کافرانه ضد حق مذهب اولان منظوریدن
آخرده تسلیم ایلدی جان زهریلی انگوریدن
زهر آتشیندن اود دوتوب اودلاندی اعضاء یکسره
(منصور)هرآن ذکر اولور منصورین اسمی سر بزیر
شرمنده نار محنت حسرتله یانام اول شریر
بیر ظلم ایدوبدی دائما فریاد ایدر خرد و کبیر
سال یاده هر آن شوریله قان آغلا قربان گوزلره
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
جلالت حضرت زینب کبری (سلام الله)
حدیث زینب آخره یتمز تمام اولماز
بو نوعی عاشق مردانه و بااحتشام اولماز
سر کویین دیسم عرش معلا وار یری حقا
ایله بیت المقدس بیر ایله دارالسلام اولماز
یقی الصابرون اجرهم اثبات و شاهددور
ننوعی صبر قیلدی ذکر اولونسا اختتام اولماز
شهود آیه لا اولیا لا علیهم خوف
ولاهم ولا حزن بیله عالی مقام اولماز
پیمبرلر چکن درد و بلانی چکدی تک زینب
تعجب ایلورم یارب نچون محشر قیام اولماز
او زینب که اونون گورموبدی قدین چشم نامحرم
سوار ناقه عریان اولوب اشراره رام اولماز
قولی باغلی جگر داغلی بارالی سینه لر باتموش
پیمبر اهلبیتی داخل بازار شام اولماز
جدالرده کسیک باشلار حرملر ناقه لراسته
بو سر مبهمه عالم بغیر از لاینام اولماز
علاوه بو جفالر گون کیمی نوک جدالرده
مخضب قانیله مرات حق راس امام اولماز
قزل قانه بلشموش یا قزل طشت ایچره یا زهرا
لب لعل حسین چوب جفادن لعل فام اولماز
مصیبت باده سین چک باشه (منصور) مست و مدهوش اول
حقیقت بیله خوش نشئه بو شیر ینلقدا جام اولماز
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
احوالات حضرت امام محمد باقر (ع)
شیعه امام باقره صبح و مسا قان آغلیون
زهرستمله جان ویروب تا جاندا وارجان آغلیون
بیحد آزارایلدی هشام او بی شرم و حیا
اوغلی امام جعفرصادقله باهم برملا
محبوس ایدوبدورشامیده بیرمدتی زندان آرا
غربت غمی فرقت غمی ایتدی پریشان آغلیون
چونکه هدایت لازم و ملزوم اهل حقیدور
حقیله باطل اولماقا ظاهربو الحق فرقیدور
ازبس بو فرقه لجه توحید حقه غرقیدور
زندانیانه ایتدیلر تفسیر قران آغلیون
عالم که اولدی علمینه عامل سوزی تاثیر ایدر
هرقدری محکم قلب اولا بیر حرفیله تغییر ایدر
بو نوعیله گوردوله حق آیاتینی تفسیر ایدر
بی اختیار اولدی هامی حضارزندان آغلیون
ماموریلر ویردی خبرهشامه بو نوعیله آه
اول بیمروت بیحیا سنگین دل و هم رو سیاه
پیغمبر اوغلین بیکس و یارو غریب و بی پناه
ایتدی مدینه شهرینه احضاره فرمان آغلیون
قاصد روانه ایلدی شهرلره ویردی خبر
هرکس امام باقره حرمت ایدوب ویرسه اگر
قانی هدردورایلرم اموالینی زیرو زبر
بو نکته نی تحقیق ایدون ای اهل عرفان آغلیون
مبهوت و حیرانم علی اولادینین بو صبرینه
چوخ بیر موثر حالیله صبر ایتدی هر بیر صبرینه
مین زحمتیله عاقبت یتوشدی مدین شهرینه
مدینلیلربیر ظلم ایدوبآغلارمسلمان آغلیون
اجررسالت حرمت اولادینی ایتدی سئوال
گورسون ننوعی احترام ایلوراو قوم بد فعال
یر ویرمیوبلر سهلیدورتوهین ایدوبلر بو ملال
ایلر النجه شیعه نی گریان و نالان آغلیون
اخرده زهر کینیله مسموم ایدوب زارایتدیلر
زهرآتشینده یاندوروب زارو دل افکارایتدیار
اوغلی امام جعفری هجره گرفتارایتدیلر
تا حسرتیله ایلدی جان بذل جانان آغلیون
آخرنفسده شیعه نی تاپشوردی اوغلی جعفره
الحق عمل یاخشی ایدوب حقه وصیت سوزلره
دوشدی شعاع مذهب اثنی عشرعالملره
دینین رموزمبهمین ایتدی نمایان آغلیون
شیعه اگرچه زهریله مقتول اولوب آچدی گورین
آچدی اوزاهلبیتینی گوردی کنارینده اوزین
ایسی قوم استه قویمادی جدی کیمی قانلی یوزین
چوخ محنتیله جان ویروب اول شاه عطشان آغلیون
ایلرکفایت عاقله (منصور) بیر رمز نهان
البته کلا عارف اسرار اولار اسلامیان
علت اودور هرایل مه ماتم هامی پیرو جوان
ایلر هامی بیرنوعیله اظهارایمان آغلیون
مرحوم منصور تبریزی
منبع کانال گنجینه گذشتگان
----------- متن اشعار منصور تبریزی ---------
شهادت حضرت امام محمد تقی (ع)
شهدت اولماقا عالمده فیض مطلق حق
شهادت هامی اولاد حقیدورمطلق
گراولماسیدی شهادت سعادت ابدی
خیال ایتمزیدی بو مقامی بیراحدی
گرک بو مرتبه مافوق هرمراتب اولا
مقام حقی بیان ایتماقا مناسب اولا
سبب اودور که محمد تقی امام جواد
او یولدا هرنه مصیبت یتوب او لوب دلشاد
گوروب رضای خداوند وار بو سوداده
تمام شوقیله اولدی بلایه آماده
بو فیض اعلم و اعلایه اولماقا نایل
اولوب بلا و غم و درد و محنته مایل
او وقت مقصد و منظورینه اولوب واصل
که اولدی مجلس کفر و عداوته داخل
امامه ظاهریدی بسکه فکربیگانه
باخاردی لیک اورکدن گلردی افغانه
گوتوردی بیرنچه لقمه ایدوب تناول آه
آلیشدی آتش زهریله جسم و جان ناگاه
زبس اثرایلدی زهرجسمی اودلاندی
دلی دوداقی آلیشدی جگرلری یاندی
گوروب که گیتدی تواناسی دوشدی طاقتدن
الی اورکده چیخوب مجلس عداوتدن
یتوشدی منزله قویدی یوزینی تپراقه
دونردی زهراثرینده گه صول و صاقه
کمال حسرتیله جان ویروب او بیکس و یار
آتوبلا کوچیه نعشین او فرقه اشرار
قالوب او حالتیله گرچه نازنین بدنی
ستمله سویمادیلار نعشینی او قوم دنی
و لیک حسرتیله جان ویرنده شاه شهید
عداوتیله ایدوب حکم ابن سعد پلید
سویوبلا جسمینیصد پاره قانینه غلطان
قوری یراسته قالوب اوچ گون اوچ گیجه عریان
نه غسل و نه کفن اولدی نه دفن ایدن یاران
یارالی باشی اولوب نیزه لرده شامه روان
حسین مصیبتی (منصور) عالمی داغلار
همیشه صاحب عصر و زمانه قان آغلار
مرحوم منصورتبریزی
منبع کانال گنجینه گذشتگان
----------- متن اشعار منصور تبریزی ---------
در احوالات حضرت موسی ابن جعفر (علیه السلام)
اون بیرایل قالدی امام انس و جان زندانیده
ویردی آخر زهریله غربتده جان زندانیده
اولدی چون موسای کاظم دستگیراهل کین
حکم ایدوب هارون او ساعت ای گروه مشرکین
وارموکل اولماقا بو شاهه آیا بیرلعین
بسته زنجیرایدوب ویرسین مکان زندانیده
اولدی اولشاهه نگهبان سنداول کان جفا
محبس تاریکه سالدی ایتمدی شرم و حیا
بیرآغورزنجیرووردی بوینونا وا حسرتا
کنده ووردی هم ایاقینه همان زندانیده
گوشه زندانیده قالدی زبسکه صبح و شام
سندایدوب هرگون اونا اوردا چوخ هتک احترام
گورنجه محبوس اولوب اواون بیرایل مدت تمام
قالموب اصلا جسمیده تاب و توان زندانیده
نازنین جسمی نحیف اولدی او نوعی سربسر
درک ایدنمزدی وجودین هرکس ایتسیدی نظر
دائما جاری ایدردی چشم گریان اشک تر
لاله تک داغلاندی قلبی اولدی قان زندانیده
ایتمدی هارون بوظلمه اکتفا ای شیعه لر
حکم ایدوب سندلعینه ویردی مین کینیله زهر
اوددوتوب اودلاندی جسمی زهرکین ایتدی اثر
سربسراعضاآلیشدی اول زمان زندانیده
ویردی جان زندانیده اول کنده و زنجیریله
دولدی عالم درد و غمدن ناله شبگیریله
قالدی اوچگون نعشی یرده حالت تحقیریله
دولدوروب عالملری آه و فغان زندانیده
اولدی بو شاهه گینه آخرده ای شیعه کفن
قالمادی گونلرایوینده قانینه غلطان بدن
کربلاده اولمادی نعش حسینی دفن ایدن
اولدی اما دورت نفر حمال عیان زندانیده
کربلاده قوملاراسته قالدی چون شاه جهان
حکم ایدوب اول دم عمرسعد ستمکارزمان
اون نفرآتلی اولوب صدپاره نعش استه روان
اولمادی بوظلملرآخراینان زندانیده
بو غریبین حالینه (منصور) آغلا صبح و شام
بو شهی باب الحوائج بل گلن سن لاکلام
عرض حاجات ایله صدقیله اولارحاصل مرام
چاره هردرد ایدرمحبوس اولان زندانیده
مرحوم منصور تبریزی
برگرفته از جلد 59 گنجینه گذشتگان
نظرات (۰)
هیچ نظری هنوز ثبت نشده است