متن نوحه ترکی مرحوم میرزا حیدر صراف تبریزی
مجموعه اشعار آیینی و مذهبی مرحوم میرزا حیدرصراف تبریزی در مدح و رثای اهلبیت علیهم السلام ، متن نوحه ترکی از مرحوم میرزا حیدر صراف تبریزی
----
زبانحال در کوچ از قتلگاه
بو دیار کربلا، بو سن خداحافظ حسین
کاروان یوللاندی شامه، من خداحافظ حسین
دستگیرم عاجزم، زنجیر ظلمه باغلیام
یدّی قارداشیم ئولوب، قارداش اورکدن داغلیام
ممکن اولمور سس چکم بیرجه دویونجان آغلیام
دوره‌می آخر آلوب دشمن، خداحافظ حسین
گُلشن جسمینده خنجر یاره‌سی گول گول آچوب
اوخ او گول گول یاره‌لر اوستونده خوش سنبل آچوب
شرح حال ائتمکلیگه هر یاره یوز مین دل آچوب
اولموسان سر تا به پا گلشن، خداحافظ حسین
فوج غم گوردوم هجوم آوردی پی در پی منه
لشکر غملن دولوب هم مَیْسره هم مَیْمنه
آختاروب، تاپدوم سنی یئتدوم کنار اَیْمَنه
ای کناری وادی اَیْمَن، خداحافظ حسین
اهل کوفه باخمادی قارداش، بو قان گوز یاشیمه
قویدیلار حسرت منی، بیر سن کیمی قارداشیمه
نه منیم باشیمدا وار معجر، کول اولسون باشیمه
نه سنون اگنینده پیراهن، خداحافظ حسین
عشق بیر سوزنده اخگر، من سپندم، نئیلرم
عشق زنجیرینده محکم پای‌بندم، نئیلرم
نه حبیبم، نه طبیبم، دردمندم نئیلرم
ائیلرم صبح و مسا شیون، خداحافظ حسین
بئله سرگرداندی بولمز نیلسون یارب، باجون
وار یئری قان آغلاسون عالمده روز و شب باجون
پردۀ عزتده گول تک بسلنن زینب باجون
ایندی ائیلر چوللری مسکن، خداحافظ حسین
شامه یول ساللام باشون آردونجه شاه راهیلن
احتیاجیم یوخ گئدم بو راهی شمع آهیلن
لمعه لمعه پرتو نور جمال اللّهیلن
ائیلیبسن عالمی روشن، خداحافظ حسین
چاره‌سیز قالدیم مگر چاره‌م تاپولماز بس منیم
دادیمه یئتمز بوگون سندن صورا بیر کس منیم
ای آتام اوغلی ئوزین وئر بیر سسیمه سس منیم
دوشدی آخر زینبین دیلدن، خداحافظ حسین
اَل تاپوب قارداش قوی دشمنلر عاجز زینبه
استراحت ممکن اولماز بیرده هرگز زینبه
زینبین ئولسون حسین گور بیرجه سنسیز زینبه
پاسباندیر شمر ذی‌الجوشن، خداحافظ حسین
باخ بو «صرّافین » رضا گوزدن آخان گوز یاشینه
عبرت ائیله سنده گوز یاشین بوراخ ئوز باشینه
دم به دم زینب دیلینجه عرض قیل قارداشینه
بو دیار کربلا، بو سن خداحافظ حسین
مرحوم صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
زبانحال حضرت لیلا (سلام الله)
بلشوب قانـه عجب زلف پریشانون اوغول
اولا کول باشینه سندن صورا دنیانون اوغول
سن‌ایـدون زینبیمـون مطلب و منظوری علی
قویدون آغلار گؤزیله یاخشی او رنجوری علی
دور گئدک خیمه‌یه، ای گؤزلریمون نوری علی
گؤزی یوللاردا قالوب خیمه‌ده لیلانون اوغول
سنی لب تشنه شهید ائیله‌دی بو قوم عدو
گلشن جسمیـوه وئردی دم پیکانیلـه سو
منده اینـدی ائـدرم قانیله تجدید وضـو
قاریشور قانیمه بو چؤلده قیزیل قانون اوغول
مرحبــا عشقـوه ای شبـه رسول مدنی
ائتمـه‌دون محضـر جانانده شرمنده منی
یاخشی الوان ائله‌دون قانیله بو گول بدنی
سرو تک دوشدی یئره سرو خرامانون علی
محفل قربده اؤز جسمیم اولوب غیر، منه
کوفه‌دن شامه وئرور جذبۀ حق سیر، منه
بو کشاکشـده علـی منزل اولور دیر، منه
اوج ائدر ناله‌سی افلاکه مسیحانون اوغول
سینه‌می نـاوک درد و غمـه آمـاج ائدرم
زینبـون طـاقت و آرامینــی تاراج ائدرم
منده بو چؤلده کسیک باشیله معراج ائدرم
قاب قوسینیم اولور طاقی کلیسانون اوغول!
سـن وفـا گلشنینون بیر گل نو رسته‌سی سن
شهـدا دستـه‌سینون عشقده سردسته‌سی سن
اولمویا من کیمی بیر سلسله پا بسته‌سی سن
نگرانـدور گؤریرم دیدۀ گریانون اوغول
نـوش قیلدون ره جانانـدا بلا جامی، علی
چکه‌جکدور بو ایشین شامه سرانجامی علی
بیرجه آچ گؤزلرون ای قلبمون آرامی علی
گؤرنه احواله سالیبدور منی هجرانون اوغول
نور دیـده! بو کمـان قدیمه بیرائیله نظر
تیر آهه یارالی سینه‌می چوخ ائتمه سپر
تؤکمسه زینب مظلومه اگر اشک بصر
یاندورور عالمی آه دل سوزانون اوغول
ای اولان سرو قدی زینب میدان بلا
کعبۀ وصلده قیلدون نه گؤزل سعی و صفا
ائیله‌دون جانوی مین شوقیله جانانه فدا
درگـه حقّـده مقبول اولا قربـانون اوغول
آغـلا ((صرّافیلـه)) بو مجلس ماتمده رضا
گؤزیاشون خرج اولا گوهر یئرینه روز جزا
آه او دمدن بویـوروب اوغلینـه شـاه شهدا
بلشوب قانه عجب زلف پریشانون اوغول
مرحوم صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
در مدح و میلاد حضرت علی اکبر (ع)
ئولومدن سختیدی عالَمده یار آیریلسا یاریندن
گوروم آیریلماسین عاشق همیشه اوز نگاریندن
گوروم فصلِ خزان گئتسین همیشه نوبهار اولسون
گوروم آیریلماسین بلبل چمنده گُل کناریندن
گوروم ظالم چراغی یانماسین بیر گونده عالمده
گوروم کام آلسین عارف کامیجه پروردگاریندن
محبّت اولماسا دنیا بویوک زنداندی انسانه
محبّت سیز جهان مِنهادی قدر و اعتباریندن
او کس کی دردِ عشقه اولمیوبدور مبتلا بولمز
نیه پروانه دونمز یانماسا شمعین شراریندن
نیه مجنون باشیندا شورِ لیلی چوللره دوشدی
مُطوّل بیر حکایت دور دلِ محزون و زاریندن
محبّت بیر یانار اودّی گرفتار اولمیان بولمز
بو سرّی آل خبر فرهاد و شیرینون تباریندن
جهانون بُت لرین سیندیردی محمودِ جهان گستر
اَیازین بنده سی اولدی ، خبر آل روزگاریندن
نه دوندی وامق عذرادن ، نه اولدی ویس رامیندن
مگر نه جذبه دور عاشقده بو طرفه نگاریندن
غرض بو سوزلری عرض ایلماقه واردی منظوریم
گویول مبهوتیدور بیر گوهرِ عشقین عیاریندن
هامی عاشقلرین جانی حسینون جانینه قربان
که تاریخِ محبّت ، زنده دی اعمالِ کاریندن
حسینی عارف و ما فی بولر عشقینده بی همتا
گیچوب آوازه سی عرشِ خدانون گوشواریندن
شبِ اَسراده گوردی اوّلین شخصیّتِ عالَم
حسین آدین یازیبلار عرشیده عرشین حصاریندن
او گوندن عشقی بیر اولسیدی ، آرتدی مین ایله اولدی
دئدی دینیم قالار زنده حسینون اقتداریندن
حسین آزاده لر آزاده سی ، جانبازِ جانبازان
گیچنده اکبریندن گیچدی گویا هر نه واریندن
نه اکبر؟ معنی اللهُ اکبر ، مظهرِ قدرت
کی واللّیل آیه سی تفسیر اولور گیسوی تاریندن
نه اکبر؟ هر تِلیندن مین دلِ لیلی وَش آویزان
نه اکبر؟ بیر گلستان گُل ، گل آکنده عذاریندن
نه اکبر؟ اعتدالِ قامتیندن سَرولر واله
نه اکبر مَستیدی نرگس هله چشمِ خماریندن
نه اکبر؟ هر گورن سویلر بو صورتده بشر اولماز
دیرسَن آهوی جاندور گلور جانان دیاریندن
اگر ائتسیدی منصوره تجلّی' حُسنِ مَستوری
اَناالحق کلمه سین اصلا دئمزدی پای داریندن
اگر چاهِ زنخدانین گورییدی یوسفِ مصری
قالاردی تا قیامت چاهیده چیخمازدی عاریندن
بلی بیله جواندان ال گوتورماخ امرِ مشکلدور
حسینه باخ کی گوزون یومدی باباسی یادگاریندن
گوروبدی ناز پروردی ایله مستِ محبّتدور
یاغور شوقِ شهادت چهره ی یوسف شکاریندن
دئدی عزم ائتموسن گیت ، دامِ زلفون آچما یول اوسته
مروّت سیزدی ال چکمز سرِ زلفون دچاریندن
بو خال و خطّ مطلوبون ، اوغول محبوبینه قربان
کی سر خطّ وئرمیشم حاشا چیخام خطّ و مداریندن
فراقینده فقط آللّهیدن صبر ایسته لیلایه
آنان یالقیزدی جان وئرسه سزادی اضطراریندن
ملامت ائتمرم ، لیلا هلاک اولسا بو محنتدن
نجه گورسون گئدور جانانی چشمِ اشکباریندن؟
حسینون نوکری (صرّاف) یازدی بو نچه بیتی
یوزه سالدی اوز عشقِ پاکینی قلبِ فکاریندن.
مرحوم صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
غزل
نقاش نقش قامت سروون روان چکر
اما یتر دوداقوه چکدیقجه جان چکر
ظاهرده گرچه قاشیله مژگان چکر ولی
باطنده قلب عاشقه تیرو کمان چکر
نرگس گوزون بنفشه خطین لاله عارضین
عکسین سالور خیاله گلور گلستان چکر
لعل لبین لبنده خطاکار عاشقه
خط خط شکسته خطیله خط امان چکر
چکسه اگر دهانوی موهوم عبث دگل
قورخار اولا دهن زده ایل دن نهان چکر
تصویریمی منیم قوجا چکدی جوان ایکن
اما سنی بو گونده دونندن جوان چکر
گوز حلقه سینده گوردی خدنگین دیدی کونول
قانلینی قان ایاقینه آخرده قان چکر
چرخ برینه شعله آهیمدی خط سالوب
اما آدین قویوبلا فلک کهکشان چکر
خنجر چکر دیلله گوزون گوز امیری تک
گوز یولدا قالمیشام گوره سن بس هاچان چکر
آلدیم سراغ زلفوی ویردیم صبایه دل
گوردوم بلددی چینه طرف کاروان چکر
سودین ایدوب ملاحظه سودای عشقده
صراف هر تجارته باخسا زیان چکر.
صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
مناجات با حضرت امام زمان (عج)
گوزوم یاشین کونول قانیله مرجان ایتمییم نینیم
بو آق دری شبیه لعل جانان ایتمییم نینیم
قوروموش نی کیمی هربند بندیمدن چیخار ناله
اسیر بند عشقم آه و افغان ایتمییم نینیم
چکیبدور سینه مه دود سیه تک آیریلوق داغی
بناسین تیشه ی آهیله ویران ایتمییم نینیم
انیسیم دردومحنت،مونسیم غم همدمیم ناله
بوجمعیتله دنیانی پریشان ایتمییم نینیم
دوتولموش خاطریم گور اهل شهرون ازدحامیندن
بویور مجنون کیمی عزم بیابان ایتمییم نینیم
گوزوم یاشی آخار هجرینده مروارید غلطان تک
اونی خون جگرلن قانه غلطان ایتمییم نینیم
دیللر شربت لعل لبون هردرده درماندور
بولورسن اهل دردم میل درمان ایتمییم نینیم
منی بیجا یره ایلر مذمت زاهد بی دین
گورنده کفر زولفون ،ترک ایمان ایتمییم نینیم
ایدیبدور باغریمی قان لبلرون قوی بیر ایچیم قانین
بو باشسیز مملکتده قانیمه قان ایتمییم نینیم
یقینیمدور اورکدن چیخسا پیکانون،چیخار جانیم
گوزل جان تک اونی سینمده پنهان ایتمییم نینیم
منی یالقوز گورنده تُرک مستین قصدجان ایلر
خط و خالون خیالین مونس جان ایتمییم نینیم
بو بازار محبت ایچره صراف تهیدستم
یتیم درّ اشکی زیب دکان ایتمییم نینیم
مرحوم حاج رضا صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
عرض ارادت به
حضرت امام حسین (علیه السلام)
ای حسین ای شرف آل عبا
بیزی گَل سَن اَلی بوش سالما یولا
مایه‌ی عزّت و جاهیم سن سن
ایکی دنیاده پناهیم سن سن
قاپوین سائلیم
آدیوین عاشقیم
سن سن عالم‌لره آیات جلی
کُلّ بوماخلقین بی بدلی
سنه قربان اولوم ای ماه جمال
سن سن عالمده گوزللر گوزلی
قاپوین سائلیم
آدیوین عاشقیم
آتش عشقه آلشدیم گلدیم
قولای اولسامدا چالشدیم گلدیم
هامی گوردوم گلوری بو قاپیا
منده بو جَمعه قاریشدیم گلدیم
قاپوین سائلیم
آدیوین عاشقیم
ای اولان فاطمیه دردانه
بیزی عشقین ایلیوب دیوانه
من سنون گُل آدیوین عاشقیم
آند اولا سن اوخیان قرآنه
قاپوین سائلیم
آدیوین عاشقیم
سنه من ای گل طاها نه دیوم
بیلوسن دردیمی آیا نه دیوم
منی مولا الی بوش ایتسن اگر
دوست‌و‌دشمن سوروشاندا نه‌دیوم
قاپوین سائلیم
آدیوین عاشقیم
دیمورم ملک جهان رهبریم
دیمورم کنز وفا گوهریم
بیر مدال شرفیم واردی منیم
من سنون نوکروین نوکریم
قاپوین سائلیم
آدیوین عاشقیم
گَل بیزی غَملَرَه مأنوس ایلمه
صوری عاشق‌لره پابوس ایلمه
بیلورم سن آناوی چوخ سُوَوسن
سَنی زهرا بیزی مأیوس ایلمه
قاپوین سائلیم
آدیوین عاشقیم
مرحوم صرّاف
----------- متن اشعار صراف تبریزی ---------
شام غریبان حضرت امام حسین (علیه السلام)
ای نور عینیم،منزل مبارک
بی کس حسینیم،منزل مبارک
چوخ اشک چشمون بنزتمه سئیله
یاندوم،منی گل یاندورما بئیله
دور بیر آناوا خوش گئلدئن ائیله
ای نور عینیم،منزل مبارک
دیندیر منی،من زهرا آنانم
بو دینمه مئکدن چوخ بد گمانم
سن خانه صاحب،من میهمانم
ای نور عینیم،منزل مبارک
باشوندو مشکواة آیات نوره
مطبخ سرانی دؤندردی طوره
خولی اوتانموب قویموش تنوره
ای نور عینیم،منزل مبارک
لازیمدو یاتسون بلبل،گول اوسته
تا سایه سالسون گول بلبل اوسته
دور سینمه گل،یاتما کول اوسته
ای نور عینیم،منزل مبارک
کسمیشدیم ایندی قان ایچره یانون
خشک ائیله یردیم زلفمله قانون
ناگه یئتیشدی ئوز ساربانون
ای نور عینیم،منزل مبارک
ای پادشاه ملک مدینه
اولدون نشانه شمشیر کینه
سنسیز حسین،بس نئیلر سکینه
ای نور عینیم،منزل مبارک
وجهی ندور بس اهلون آتوبسان
چون اشک زینب،قانه باتوبسان
اکبر نولوبدور یالقوز یاتوبسان
ای نور عینیم،منزل مبارک
گؤردوم وئروب جان،یئتمیش ایکی جان
بیر آغلیان یوخ،اولدوم پریشان
گلدیم دوتام من شام غریبان
ای نور عینیم،منزل مبارک
گیرم داغیلدی جاه و جلالون
تا لانه گئتدی مال و منالون
هاردا قالوب بس بیکس عیالون
ای نور عینیم،منزل مبارک
یوخسا چئکوبسن گوندوز اذیّت
ایندی اولوبسان،بیر لحظه راحت
دور یانما،یاتماز اهل محبّت
ای نور عینیم،منزل مبارک
گلدون وجوده صرّاف عدمدن
گئتمه کناره گل بزم غمدن
قوی نوحه اولسون جاری قلمدن
ای نور عینیم،منزل مبارک
صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
احوالات شب عاشورا
گل گلزار رسالت بو گئجه
شمردن ایستدی مهلت بو گئجه
بیر دویونجه باخا اکبر یوزینه
ائیلیه آیه تلاوت بو گئجه
زینبون قلبینی آرام ائلیوب
اولا مشغول عبادت بو گئجه
یاتمیوب آل علی صبحه کیمی
شیعه یاتسون نئجه راحت بو گئجه
بولمورم نئیلدی بس تازه گلین
اونا یوز وئردی نه حالت بو گئجه
ام لیلایه بویوردی شه دین
سنده وئر اوغلوا زینت بو گئجه
دوتدی دنیا یوزینی موج بلا
داشدی دریای مصیبت بو گئجه
کربلا ایچره اولوب محشر عیان
گوئیا قوپدی قیامت بو گئجه
باغلانوب سو یولی لب‌تشنه قالوب
عترت شاه ولایت بو گئجه
شهدالر آدینا کلک قضا
یازدی فرمان شهادت بو گئجه
مرحوم صراف
منبع مجموعه کانالهای مدح و مرثیه
----------- متن اشعار صراف تبریزی ---------
احوالات ورود به کربلا
چون دشت بلا منزل اولوب میرحجازه
زینب او زمان گوزیاشینا ویردی اجازه
عرض ایلدی قارداش ندن اولدون بیله دلگیر
تاپدی نیه بو رنگ شریفون بیله تغییر
نه باعث اولوب آهون ایدر عالمه تاثیر
کشف ایله گوگل سرّینی بو محرم رازه
وجهی ندی قارداش ساری گل‌تک سارالوبسان
من دربدر عشقی غم و درده سالوبسان
زینب سنه قربان نیه بو حاله قالوبسان
آرتار سنه باخدیقجا غم اوستن غم تازه
بو دشت غم افزادی مگر عشق مناسی
بیر اوزگه هوادور گورورم آب و هواسی
باشدان بولورم وار باشیمون چوخلی بلاسی
جان اوّل منزلده نولور گیتسه گدازه
شاه شهدا آچدی لب لعل گهربار
فرمایش ایدوب زینبه کای خواهر غمخوار
صحرای بلادور بو دولانماز بورا اغیار
بیگانه‌نی قویمازلا یته مجلس رازه
بوردا باتاجاق قانه باجی گل کیمی قانلار
ناحق یره بوچولدن آخار سو کیمی قانلار
مین شوقیله باشین ویری بوتازه جوانلار
عریان قالی یتمیش ایکی صدپاره جنازه
بو چولده باتار قانه گل سنبل اکبر
لیلا اولی دیوانه برای دل اکبر
بو نوعیلن آشفته اولور کاکل اکبر
عشق اهلی دوشر آرزوی دور و درازه
بو یرده باتار یاسه باجی قاسم آناسی
بو چولده اولور اوغلونون آخِر طویییاسی
دامادین اولور طوی گونی اوز قانی حناسی
حسرت قالی بیچاره گلین حجله ی نازه
عبّاسی گورورسن چکیلوب قدّی علم تک
هر درد و غمون بیر یانا ای باجی بو غم تک
ظلمیله دوشر قولّاری بیر جفت قلم تک
صدحیف او اوزون قدّه او بازوی درازه
وار اوزگه مصیبت چوخ ایدر قلبیوه تاثیر
گلمز دله امّا ایدرم رمزیله تقریر
منده دیرم نیزهده آوازیله تکبیر
باشسیز دورارام اونداکی قان ایچره نمازه
«صراف» آت اوز نقدیوی کسب زر دین ایت
بول قدرینی یاز نوحه سوزون دُرّ ثمین ایت
تایید حسین اولیمه هر کیمده یقین ایت
مشکلدی قلم صفحیه بیر کلمه نی یازه
مرحوم میرزا حیدر صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
حضرت امام زمان (عج)
قرا گوزونده گوزل قصد جان علامتی وار
بو جان اونوندو قوی آلسون منه نه منتی وار
گوزون گوز ایلدی جان آلماقا قاشون آلدی
بو امر خیر ده قاش و گوزون شراکتی وار
بو درد هجریلن اولمک اگر چه خوشدو منه
باشیم دیزینده وئرم جان بیر اوزگه لذتی وار
نقدر اوخ آتا مژگانلارین توتار سینه م
سنون اوخونله منیم سینه مین رفاقتی وار
او خنجرون بو باشیم کس آپار منی قورتار
چکنمرم بدنه باشمون اذیتی وار
شکنج زولفوی گورجک دئدی نجوم اهلی
بو آی باشیندا عجب فتنه لر قیامتی وار
گتور قدملروه باش و جان ائدیم شاباش
گوروم بو جان سنه قربان اولا لیاقتی وار
ملامت ائتمه منی مدعی اوتان تاریدان
بو عشق، عشق مجازی دئگول حقیقتی وار
منیم بو عشقیمه بنزر نئجه سنون عشقین
ظهوری منده ائدیب جلوه سنده صحتی وار
منیم نگاریمی عاشق گوزونده گورمه میسن
همین بو قدر ائشیدوبسن گوزلدی شهرتی وار
زبان حال ایله حالیمدن ائتمیشم حالی
چوخ اهل حالدی یاریم غریبه حالتی وار
نه قدر من اونی چوخ ایسترم اورک دولوسی
اونون منه بیره یوز مین ائله محبتی وار
مرحوم میرزا حیدر صراف تبریزی
منبع مجموعه کانالهای مدح و مرثیه
----------- متن اشعار صراف تبریزی ---------
مدح و جلالت و منقبت
امیرالمومنین حضرت علی (علیه السلام)
ای جمالی مظهر آیات کبری یاعلی
وی جلالیندن حلال حق هویدا یاعلی
فیض جودیندن وجود ماسوا موجود اولوب
ای وجود ماسوایه فیض عظما یاعلی
نور حق آئینه ذاتینده اولموش جلوه گر
ای صفات آللهه مرآت تجلا یاعلی
لوح حسنونده یازیلمش آیه الله نور
صورتینده کلمه مشکوه معنا یاعلی
سن بو مخلوقاته باب علمی مفتوح ایلدین
شاهدیمدور سوره انا فتحنا یاعلی
الف قدین، خلقه لاء نفی اثبات ایلدی
کلمه توحیده سنسن الف الا یاعلی
من نجه وصف ایلیم خالق سنه مداح اولوب
دولدوروب قرآنی اوصافون سراپا یاعلی
کم و کیف ذاتوی درک ایتمز اوهام و عقول
ذات پاکوندور مرکب دن مبرا یاعلی
گر دییم ممکن سنه، سن تک بشر ممکن دگل
ور دئسم واجب، اولور کفریم هویدا یاعلی
ایله ممکن سن، که واجبدور وجودین عالمه
ای وجودی علت غایی اشیا یاعلی
نار قهریندن اولور نام جهنم شعله ور
نور مهریندن دولوب فردوس اعلا یاعلی
پرتو نور جمال بی مثالیندان سنین
مقتبس دور آفتاب عالم آرا یاعلی
ای ولی الله اعظم، عالم و آدم سنه
بنده دور، سنسن بو مخلوقاته مولا یاعلی
خواجه قنبر، امیرالمومنین، یعسوب دین
فاتح خیبر، شه دنیا و عقبا یاعلی
ای کلام الله ناطق، وی کلید کنت کنز
آشکار اولمیش سنیله گنج اخفا یاعلی
باب شبیر و شبر، ابن عم خیرالبشر
صاحب محراب و منبر، زوج زهرا یاعلی
ای در بحر شرف، شاهنشه ملک نجف
سر حق سندن اولوب عالمده پیدا یاعلی
پادشاه کون و امکان، جسم مخلوقاته جان
سرور مردان، امیر ملک بطحا یاعلی
قدرت الله، حجت الله، جانشین مصطفی
آیینه رحمت، ولی حی یکتا یاعلی
عالم علم سلونی، معنی ام الکتاب
واقف اسرار سر لیل اسرا یاعلی
عروه الوثقایه معنا، تاجدار انما
قفل گنج هل اتی، مصداق طاها یاعلی
ای شه والا مکان، پیوسته ایلر آرزو
درگهین اسفل مقامین عرش علیا یاعلی
آب اولور آتش، سر کویون هواسندن سنین
خاک پاییندور عجب گوگرد حمرا یاعلی
آستان درگه پاکین چراغان ائتمگه
مشعل خورشید اله آلمیش مسیحا یاعلی
سن صفی آللهه ویردین زنگ محنتدن صفا
اسم پاکندور سنین اسماء حسنا یاعلی
نار نمرودی ایدوب لطفون خلیله گلستان
پور آزر گورمیوب آذردن اوتدا یاعلی
فلک محنتدن تاپیب نوح نبی الله نجات
اونداکی ایتدی سر کویونده ماوا یاعلی
سن ذبیح آللهه مشق عشق تعلیم ایلدین
ویرمه میش باشین آلیب تاج فدینا یاعلی
اولماسیدی حضرت عیسائیله همدم دمین
هاردا روح الله ایدردی مرده احیا یاعلی؟
قاسم الرراق سنسن، خوان جودیندن سنین
قوم اسرائیله گلدی من و سلوا یاعلی
مهر رویین ایتدی موسادن ید بیضا عیان
ایلدی فرعونی قهرون غرق دریا یاعلی
میزبان اولدون حبیب اللهه سن معراجده
دگلم منکر ایدم حاشا و کلا یاعلی
نازنین آدین، سلیمان ایلدی نقش نگین
اولدی جن و انسه هر فرمانی مجرا یاعلی
بیت الاحزان ایچره، سن یعقوبه اولدون هم نفس
محنت هجره ایدوب صبر و شکیبا یاعلی
دولدوروب آفاقی حسنون، صوت ما هذا البشر؟
حسن یوسف ذره دور حسنین یانندا یاعلی
ای جمال الله، جمالین اولسا ظاهر پرده دن
پرده عصمتده قالماز بیر زلیخا یاعلی
هر گوزل معشوقه بیر عاشق، بیابان گرد اولوب
سن منی، فرهادی شیرین، قیسی لیلا یاعلی
عرصه محشرده (صرافین) یتیش فریادینه
چون سنین مدحین ایدر املا و انشاء یاعلی
مطلب و منظوری شاها، التفاتیندور سنین
یوخ یقین گوگلنده بیر اوزگه تمنا یاعلی
فکر و ذکری روز و شب ده، وردی یا محبوب اولوب
کیمدی سندن اوزگه محبوب دل آرا یاعلی
اوزی بیر مور محقر، دفتری پای ملخ
چوخ سعاتدور اگر مقبول اولونسا یاعلی.
مرحوم استاد حاج رضا صراف
منبع مجموعه کانالهای مدح و مرثیه
----------- متن اشعار صراف تبریزی ---------
در مدح حضرت زینب کبری (سلام الله)
عزّ و شرفه دارا زهرا قیزی زینبدی
قرآنی ایدن احیا زهرا قیزی زینبدی
چاتماز بونا بیر عورت عفّتده دیانتده
بی مثلدی بی همتا عزّتده شرافتده
استادیدی بو خاتون حکمتده ریاضتده
دین درسینه چوخ دارا زهرا قیزی زینبدی
جان قویدی بو دین اوسته عزّتله قدم ووردی
کابینه ی کفّاره بیر نقش عدم ووردی
تبلیغ ایلدی دینی هر یرده علم ووردی
خورشید جهان آرا زهرا قیزی زینبدی
باخ زینب کبرایه هم دشت غم آهنگه
سرقافله ی عشقی قویموبدی دوشه لنگه
اوغلانلارینی فوراً آماده ایدوب جنگه
هر گون ایدن عاشورا زهرا قیزی زینبدی
باغلوب کمر همّت زهرا قیزی مردانه
وقف ایلدی اوز جانین شاهنشه دورانه
دلبند علی هرگز عجز ایلمز عدوانه
پروانه ی بی پروا زهرا قیزی زینبدی
تا شمس هدی باتدی آفاقی دوتوب ظلمت
شاهنشه دین اُلدی تاپدی او قوشون جرات
ظلمیله او گون اولدی خرگاه حسین غارت
خرگاهی اولان یغما زهرا قیزی زینبدی
صحرای بلا ظلمی هرچند تمام اولدی
بانی ایله بیر ظلمه اول لشکر شام اولدی
سردسته اسیرانه باطنده امام اولدی
ظاهرده اولان امّا زهرا قیزی زینبدی
سعداوغلی او گون یازدی اوز ظلمینه برنامه
آغلار گوزیله زینب تا عازم اولا شامه
شاماته یتوب سالدی بیر شورش و هنگامه
هند اوغلون ایدن رسوا زهرا قیزی زینبدی
قصدی بوئیدی گیتسون شاماتیده کام آلسون
اثبات فساد ایتسون عالمده مرام آلسون
خوار ایلسون اعدانی دنیانی تمام آلسون
بو قصدیله پابرجا زهرا قیزی زینبدی
مدحی نه گوزل یازدون زینب آدینا اشعار
چون ارزش اشعاری ارباب کلام آنلار
حضّاریله قبرینده بو نوحه نی قیل تکرار
عزّ و شرفه دارا زهرا قیزی زینبدی
مرحوم آقای میرزا حیدر صرّاف تبریزی
متخلّص به مدحی
منبع مجموعه کانالهای مدح و مرثیه
----------- متن اشعار صراف تبریزی ---------
در مدح حضرت امیرالمومنین
علی ابن ابیطالب (علیه السلام)
ای شهریار مملکت اولیا علی
وی شهسوار معرکۀ اوصیا علی
ای مصدر جلال خداوند ذوالجلال
وی مظهر جمال جمیل خدا علی
ای منبع کرامت و دریای علم و حلم
وی معدن سخاوت و بحر عطا علی
ای درّ درج عزّ و شرف و شاه (لَو کَشَف)
وی ماه برج مهر وفا و سخا علی
ای گلشن حقیقته بیر طرفه باغبان
وی محفل هدایته نور هدا علی
نایب مناب محکمه شرع مصطفی
قائم مقام مصطبه اصطفی علی
ای خانه زاد خانه حق وی شه بحق
ای خاصّ مَحرم حرم کبریا علی
ای پادشاه ملک قضا وی شه قدر
وی دادخواه روز جزا مرتضا علی
حبل المتین، امام مبین، پیشوای دین
مسند نشین بارگه اتقیا علی
وی سالکان عالم لاهوته مقتدا
وی سالکان کوی حقه رهنما علی
ای گوهر ولایته بیر پر بها صدف
وی اختر امامته ( نُورٌ بِها ) علی
امرونده دور زمین و زمان ، امر (کُن فَکان)
حکمونده دور سنون همۀ ماسوا علی
سنله اوجالدی بیرق دین محمّدی
ای صاحب شریعۀ صاحب لوا علی
اسلامون ایتدی کج قلجون راست قدّینی
اولسون او ضرب شصتیوه جانیم فدا علی
ای ناخدای کشتی دریای لامکان
ای ابتدای خلقتی بی انتها علی
( بَدرُ الدُجی) ولیّ خدا شاه لافتی
(کَهفُ الوَری) شهنشه مشکل گشا علی
سنسن ممیّز مشعل والشمس و الضحی
سنسن امیر مسند عزّ و علا علی
سنسن کلید قفل در گنج و معرفت
سنسن امید و ملجأ شاه و گدا علی
شأنونده گلدی آیۀ بَلِّغ پیمبره
وصفونده نازل اولدی سنون إنّما علی
سنسن حبیب حضرت معبوده جانشین
سنسن طبیب درد دل بینوا علی
بی شک و شبهه خلقت ارواح انس و جانّ
اولموش سنون وجودیوه وابسته یا علی
اولدون محبّت اهلینه مصداق (کُنتُ کَنزٌ)
ایتدون حقیقت اهلینه کشف غطا علی
صرّاف نقد عمرون ائدوب صرف معصیت
از بس گوروب متاعنی چوخ کم بها علی
روی سیاهیله زر ناقص عیار تک
امّیدوار دور سنه یا مرتضی علی
مرحوم میرزا حیدرصراف تبریزی
منبع مجموعه کانالهای مدح و مرثیه
نظرات (۰)
هیچ نظری هنوز ثبت نشده است